اتصل بنا

ليه ممكن تحس بالجوع طول الوقت؟

heart

طول الوقت حاسس أنك جعان ومابتشبعش أبدا!

وأكيد ده بيخليك فى بعض الأحيان تزيد فى الوزن أو بيقلل نقصك للوزن مع الدايت أو حتى قلقك وعايز تعرف السبب.

يمكن تتخيل أن مفيش مشكله فى أنك جعان عادى يعنى، لكن الحقيقه الجوع ده ممكن يكون مفتاح لتشخيص بعض الأمراض وأسبابه كتيره ومختلفه.

الأول نعرف ايه هو الجوع؟
فى المخ فى مركزين:
- مركز الجوع: وده بيدى انذار لو الطاقه فى جسمك غير كافيه عشان ينبهك أنك لازم تاكل عشان تدخل طاقه لجسمك.
- مركز الشبع: وده بقى واضح من اسمه انه المسئول عن أنه يديك أحساس الشبع لما الجسم يستقبل الكميه الكافيه.

نرجع بقى للسؤال الأهم:ايه اللى ممكن يخليك دايماً حاسس أنك جعان؟

تعالوا نستعرض مع بعض أهم الأسباب وازاى تعرف اذا كان هو ده السبب الحقيقى ولا لا:

ممكن يكون مرض السكر؟

  • ممكن يكون مرض السكر؟
    الخلايا بتعتمد فى انتاج الطاقه على الجلوكوز ولو الخلايا مفيهاش جلوكوز كافى هتبعتلك اشارة أنها محتاجه تاكل عشان يوصل جلوكوز.
    فى مرض السكرى اللى بيحصل أن بالرغم من وجود الجلوكوز فى الدم بنسب عاليه الا انه مش عارف يدخل الخلايا وبالتالى الخلايا عندها احساس خاطئ ان مفيش جلوكوز فى الجسم وكمان مركز الشبع ف المخ بيعانى من نفس المشكله، فيطلب منك أنك تاكل عشان توصل للخلايا جلوكوز وده بيخليك تشعر بالجوع الدائم!
    فى النوع الأول من مرض السكر بيكون الأكل الزايد مش مصاحب بزيادة وزن بالعكس بيحصل نقص فى الوزن.
    طب تعرف منين لو هو سكر؟من أعراض هتكون مصاحبه للجوع وهى:
    - العطش المستمر
    - زغلله فى العين
    - الجروح بتاخد وقت كبير عشان تلتئم
    - التبول المتكرر
    - تنميل فى الأطراف

  • ممكن يكون نقص مستوى السكر فى الدم؟
    بنفس الفكرة السابقه الخلايا حاسه ان مفيش سكر (جلوكوز) فى الجسم لكن الفرق ان المرة دى احساسها حقيقى فعلاً مش خاطئ.
    مرضى السكرى ممكن يتعرضوا كمان لنقص سكر الدم لو أخدوا أنسولين أو أدويه مخفضه للسكر وماكلوش بعدها أو بذلوا مجهود كبير.
    كمان فيه بعض الأمراض اللى ممكن يصاحبها نقص سكر الدم مثل: أمراض الكبد، الكلى أو الغده النخامية أو الكظريه.
    مع النقص الشديد فى سكر الدم ممكن يصاحب احساس الجوع أعراض أخرى منها:
    - التوتر والقلق
    - شحوب الجسم
    - ضربات قلب سريعه
    - ارتعاش
    - تعرق
    - تنميل حول الفم

  • ممكن يكون قلة نوم؟
    النوم القليل وحرمانك من النوم بيلخبط هرمونات الجسم وبيسبب زيادة الشهيه وخصوصاً للأكل الغنى بالدهون والكربوهيدرات.
    أنت أكتر واحد هتقدر تحدد لو بتعانى من قلة النوم لأنك عارف بتنام قد ايه وبتقوم مرتاح من النوم ولا لا. وحرمان النوم ممكن كمان يسبب أعراض تانيه تشمل:
    - تغير فى المزاج
    - عدم القدرة على التركيز
    - زيادة الحوادث
    - زيادة الوزن

  • ممكن يكون توتر؟
    لما بتكون تحت ضغط او متوتر ده ينتج عنه افراز جسمكهرمون الكورتيزول وده بيزود احساسك بالجوع.
    كتير من الناس مع التوتر بتحب تاكل شيكولاتات أو أى حاجه غنيه بالدهون عشان تقلل توترهم.
    مع التوتر بتيجى أعراض تانيه:
    - نوبات غضب
    - أرق
    - ألم فى المعده
    - صداع
    - اجهاد

  • ممكن يكون طريقة أكلك هى السبب؟
    مش كل الأكل بيملى المعده بنفس القدرة يعنى مثلاً الأكل الغنى بالبروتين زى اللحم، سمك ومنتجات الألبان وغيره أو غنى بالألياف زى حبوب القمح الكاملهوالخضروات عندهم القدرة أنهم يملوا المعده ويحسسوك بالشبع.
    فى المقابل الأكلات زى المكرونة، العيش الأبيض والوجبات السريعه بتفتقر للمكونات دى وبيحتووا على كميات كبيرة من الدهون والسعرات الحراريه فممكن تلاقى نفسك بتاكل منهم كميات كبيرة وتفضل جعان.
    فيه أعراض تانيه ممكن تلفت نظرك أن طريقة أكلك مش مظبوطة:
    - الأمساك
    - آلام فى المعده وعسر هضم

  • ممكن يكون من أدوية معينه؟
    فيه بعض الأدويه من أعراضها الجانبيه أنها تسبب زيادة فى الشهيه واحساس بالجوع من أشهر الأدويه دى:
    - مضادات الحساسيه
    - الكورتيزون
    - بعض أدوية السكر
    - بعض الأدويه النفسيه
    لو حسيت انك زدت فى الوزن مع استخدام أحد الأدويه دى فغالباً هى السبب، واتكلم مع الطبيب الخاص بيك لو فيه بدائل ممكن تستخدمها وماتسببش المشكله دى.

  • ممكن تكونى حامل؟
    كتير من السيدات بتحس أنها جعانه أوى مع الحمل وشهيتها بتزيد، الحقيقه هى دى طريقة البيبى أنه يتأكد أنك بتاكلى كويس عشان هو كمان يوصله أكل ويكبر.
    معظم السيدات بيزيدوا من2 لـ 3 كيلو فى أول 3 شهور فى الحمل وحوالى نص كيلو فى الأسبوع فى أشهر الحمل التاليه.
    بعض الأعراض التانيه اللى ممكن تصاحب الحمل:
    - الدورة الشهريه ماجاتش فى ميعادها
    - تكرار التبول
    - الغثيان
    - الثدى ممكن يكبر فى الحجم

  • ممكن تكون الغده الدرقيه؟
    الغده الدرقيه تعتبر ثرموستات الجسم، بتمشى الجسم بمعدل مظبوط طول ما هرموناتها فى الجسم نسبتها مظبوطه لكن لو النسب قلّت فالجسم كل عملياته بتكون أبطء.
    أما لو النسب عاليه فالجسم كله هيكون كل عملياته سريعه وبالتالى هيحتاج طاقه كبيرة وأكيد ده معناه أنه هيحتاجك تاكل أكتر وتحس بالجوع أكتر، لكن مع نقص فى الوزن لأن اللى بتاكلها بتحرقه فى كل العمليات.
    نشاط الغده الدرقيه بيكون معاه أعراض تانيه:
    - نبض سريع
    - عصبيه زايده
    - عدم تحمل الحر
    - تعرق شديد
    - العطش

  • ممكن يكون الصودا الدايت؟
    احياناً بدائل السكر الموجوده فى المشروبات دى بتخلى المخ متوقع الحصول على سعرات حراريه عشان يستخدمها وده بيخليه يبعتلك أنك دلوقتى محتاج تاكل ويحسسك بالجوع.
    فى بعض الحالات ممكن لو ده السبب زيادة استخدامك للصودا الدايت ممكن يكون معاها التالى:
    - الصداع
    - زيادة الوزن
    - زيادة الشهيه للسكريات
Image Ads

التعليقات

fff