اتصل بنا

تحاليل السكر

diabetes

أكيد كلنا سمعنا عن تحليل السكر الفاطر والصايم، بس كمان فيه تحاليل تانية زى السكر العشوائى وتحليل Glycated hemoglobin (A1C).

تعالوا بقى نتكلم عنه أكتر وبشكل أوضح وازاى بنعالجه.

السكر الصايم:

وهنا بناخد عينة من الدم بعد ما يكون المريض صايم بالليل. النسبة الطبيعية ان نسبة السكر فى الدم أقل من 100.

لكن لو طلعت النتيجة من 100-126 يبقى انت واقع فى منطقة ما قبل السكرى وده بيقولك خلى بالك لو ماظبطتش نفسك الخطوة الجاية هيجيلك المرض.

أكتر من 126 هنا بقى بنقول أنك مريض سكر.


السكر الفاطر:

بعد ما تصوم وتقيس سكرك الصايم، تشرب مشروب سكرى وبيتم قياس السكر بشكل متكرر على مدار ساعتين.

القياسات لو أقل من 140 يبقى ده طبيعى، لو من 140-200 ده ما قبل السكرى، أكتر من 200 ده يشخص مرض السكر.


السكر العشوائي:

ده بقى بتاخد عينة من الدم فى أى وقت مش مهم أخر مرة كلت إمتى. لو 200 أو أقل ده مش سكر، لكن لو أكتر من 200 ده يشخص سكرى.


Glycated hemoglobin او (Hb A1C):

الأرقام 6.5% او أكتر باختبارين مختلفين بتقول إن عندك السكر. أقل من 5.7% طبيعى، وما بينهما ما قبل السكرى. كمان التحليل ده عامل زى جهاز كشف الكذب كده، يعنى لو أنت مش مظبط سكرك ومش ماشى على العلاج، وقبل ما تروح للدكتور تظبط أكلك وتاخد علاجك عشان لما تروح للدكتور وتقيس يبقى مظبوط .. الأختبار ده هيكشفك لأنه بيقيس نسبة السكر المرتبط بكرات الدم الحمراء "وعمرها بيكون 3 شهور" يعنى بيوضح فى الـ 3 شهور اللى فاتوا سكرك كان متظبط ولا لا.

كمان ممكن نلجأ أننا نقيس الأجسام الكيتونية فى البول واللى وجودها فى البول وزيادتها بيتناسب مع ارتفاع السكر فى الدم ومؤشر أن المريض ده ممكن يدخل فى غيبوبة سكر.


خطط علاج مرض السكر:

علاج السكر بيعتمد على نوع المرض اذا كان الأول ولا التانى. لأن زى ما اتكلمنا مع حضراتكم فى النوع الأول الجسم يعتبر خالى تماماً من الأنسولين وما بيقدرش يصنعه وبالتالى العلاج الوحيد له هيكون انى أدخل للجسم أنسولين خارجى.

أما فى النوع التانى الجسم بيفرز أنسولين لكن فيه مقاومة لشغله وبالتالى علاجه ممكن محسنات لحساسية الخلايا للانسولين أو أدوية بتخلى البنكرياس يفرز أنسولين او ممكن نلجأ للأنسولين الخارجى.

النظام الغذائى والرياضة الخفيفة كمان مهمين جداً لأى نوع من أنواع السكر.

مهم جداً نفهم الأول حاجة، أن كل جسم له رد فعل مختلف للعلاج وكل مريض نسبة السكر بتاعته بتختلف عن التانى والمقصود أننا نفهم أن مرض السكر لازم معاه بشكل مستمر نتابع ونقيس السكر مع العلاج عشان نتأكد ان خطة العلاج صحيحة وان مفيش تغير طرأ يكون سبب لتغيير طريقة العلاج.


الأنسولين:

زى ما اتفقنا الأنسولين هو العلاج والحل الوحيد لمرضى النوع الأول وكمان ممكن نلجأله فى علاج النوع التانى لو فشلت كل الأدوية التانية انها تسيطر على سكر الدم.

فيه أنواع مختلفة من الأنسولين، سريع المفعول وممتد المفعول والرايق والمعكر. وبيتاخد الأنسولين بحقن تحت الجلد وده لأنه ماينفعش يتاخد عن طريق الفم لأنه هيتكسر فى المعدة بأنزيمات الهضم.

فيه كمان مضخة الأنسولين، ودى بتفضل موصولة بالجسم طول الوقت وتضخ أنسولين بشكل متواصل بس بمعدلات مختلفة عشان يحاكى نفس أسلوب إفراز الجسم للأنسولين.


أدوية السكر الأخرى:

كل الأدوية هنا خاصة بالنوع التانى وملهاش فايدة مع النوع الأول.

الأدوية التانية طريقة عملها بتختلف: فى منها اللى بيحفز البنكرياس يفرز أنسولين، أو بيحسن حساسية الخلايا للأنسولين، أو بيقلل إنتاج أو خروج الجلوكوز من الكبد.

بعضها بيمنع تكسير المواد الكربوهيدراتية فى الجسم فبيمنع زيادة السكر اللى هينتج من تكسيرها.

بشكل عام محسنات حساسية الخلايا "ميتفورمين أشهرهم" يعتبر أول الأدوية اللى بنستخدمها فى علاج النوع التانى.


زراعة البنكرياس:

يعتبر الحل ده عبقرى لمرضى النوع الأول ومش هيحتاجوا ساعتها للأنسولين الخارجى لكن المشكلة ان الزراعة مش دايماً بتبقى ناجحة وممكن يحتاجوا انهم يمشوا على مثبطات للمناعة طول العمر "عشان تمنع رفض الجسم للبنكرياس المزروع لأن الجسم ممكن يعتبره جسم غريب ويحاربه".

الحقيقة زراعة البنكرياس لها آثار جانبية ممكن تكون أخطر من فايدته وده بيخلينا نعيد النظر فى الحل ده.


علاج مرحلة ما قبل السكرى:

الحالة دى بتسبق النوع التانى من مرض السكر مش كل الناس ممكن تكتشف نفسها فى المرحلة دى، لكن لو كنت محظوظ ف ده مفيد جداً ليك لأنك ممكن تلحق نفسك وتمنع تطور الحالة لمرض السكرى.

تغيير أسلوب حياتك هو أنسب خطة للعلاج فى المرحلة دى، يعنى تظبط أكلك وتمارس الرياضة وده ممكن يكون كفيل أنه يرجع سكرك لمعدلاته الطبيعية فى الدم.

أحياناً بنلجأ لاستخدام بعض الأدوية خصوصاً الميتفورمين لأنه بيحسن حساسية الخلايا للأنسولين كمان.


Image Ads

التعليقات

fff