اتصل بنا

أهم الأمراض التي تصيب الأطفال

diseases

صحة طفلك هى أهم حاجة عندك وعشان كده اسمحيلنا نعرفك على أشهر الأمراض اللى ممكن يتعرضلها طفلك فى أول سنة من عمره.

  1. حساسية الأطفال:

    حساسية الأطفال مشهورة فى أول سنة وممكن تكون لأسباب كتير زى حساسية الأكل زى السمك، الفول السودانى، البيض والألبان وغيرهم. بس مش ده السبب الوحيد للحساسية فى طفلك، السبب ممكن يكون التراب أو أى حاجة فى الجو. طفلك ممكن يحصله أعراض مختلفة تتراوح من حساسية بسيطة لأعراض خطيرة، والأعراض ممكن تتمثل فى:


    - انسداد في الأنف
    - العطس
    - طفح جلدي

    أو أعراض خطيرة "لازم التدخل الطبى العاجل والسريع للطفل" زى:
    - تورم الوجه و العين
    - اختناق: بسبب تورم في الحنجرة


  2. أكيد دى من الحالات اللى لازم تراجعى الطبيب فيها لأن بيكون فيه على طفلك بعدها قايمة او أنواع معينة من الممنوعات.

    غالباً الحل هنا أنك تمنعى من أكل طفلك أى حاجة بتسببله الحساسية وللألبان استخدمى الألبان المخصوصة الخالية من المواد اللى طفلك بيعانى من حساسية فيها. وكل ده هيكون تحت أشراف الطبيب وبتعليماته.



  3. نزلات البرد:أكيد كلنا عارفين ازاى الأطفال فى أول سنة بيتعرضوا كتير جداً لنزلات البرد واللى بيكون سببها فى الغالب عدوى فيروسية. الأعراض:

    الأعراض:
    - انسداد الأنف بالمخاط
    - الكحه و العطس
    - تزييق في الصدر
    - ممكن يسبب قله في النوم او الأكل
    - ارتفاع بسيط في درجة الحراره

    العلاج:

    بنكرر فى كل مناسبة أننا متأكدين أنك بتخافى على طفلك وعايزاه يخف بسرعة، بس البرد الفيروسى مالوش علاج! هو بيقعد فترة وبيقضى عليه الجسم بنفسه. والمضادات الحيوية مالهاش دور نهائى فى عملية الشفاء "طول ما العدوى فيروسية".

    أما العلاج هنا فبيكون فقط للسيطرة على الأعراض طول فترة المرض زى:

    خافضات الحرارة:
    خافضات الحرارة مش هتقتل الفيروس لكنها ممكن تحسن قدرة الجسم على محاربته.

    خلى بالك أن الأدوية اللى مادتها الفعالة الباراسيتامول من الخوافض الجيدة لكن للأطفال أكتر من 3 شهور. أما الأيبوبروفين لو طفلك أكتر من 6 شهور.

    ماتستخدميش عقاقير الأسبرين فى حالات العدوى الفيروسية لأنها ممكن تبقى خطيرة.

    طبعاً التعامل مع الأطفال فى الأدوية بيتطلب احتياطات معينة فيفضل قبل استخدام أى دواء استشيرى الطبيب.

    للكحة:
    منظمة الأدوية والغذاء بتنصح بعدم إستخدام أدوية الكحة للأطفال تحت السنتين، وبتنصح أنه من الأفضل علاج السبب واللى ممكن يكون برد عادى أو التهاب رئوى أو غيره.



  4. عدوى فيروس مخلوي تنفسي Respiratory syncytial virus:

    العدوى بالفيروس ده مشهورة خصوصاً أقل من سنتين وهى حالة فى الغالب مش خطيرة وأعراضها قريبة من أعراض البرد العادى لكن ممكن تكون أشد فى الأعراض وممكن يكون معاها تنفس سريع وممكن زرقان للشفة لكن ده مع الحالات العنيفة.

    المهم أنك تستشيرى الطبيب لو حسيتى أن فيه مشاكل فى التنفس عند طفلك.

    بسبب وجود الفيروس ده فى الممرات الهوائية، العدوى ممكن تتقلب من مجرد أعراض برد عادية لعدوى للشعب الهوائية أو حتى الألتهاب الرئوى عشان كده التعامل مع الفيروس لازم يكون سريع.

    العلاج بيكون على حسب شدة العدوى، ممكن الطبيب يوصف لطفلك أدوية عادية زى خافضات الحرارة وغيره ويكون العلاج فى البيت عادى. أو أن العلاج يتطلب أن الطفل يتحجز فى المستشفى وممكن يحتاج محاليل أو أوكسجين وممكن لجلسات بخار وغيره.



  5. الإمساك: عدد المرات اللى الطفل بيخرّج البراز فيها بتختلف من طفل لأخر، لكن لو حسيتى أنه عددها قل أو أن البراز أصبح ناشف أكتر من الطبيعى.

    ممكن يكون ده معناه أن طفلك بيعانى من الأمساك وممكن يصاحبه مغص "بيحرك رجله ناحيه بطنه " وبكاء. طبعاً مع استشارة الطبيب فيه بعض النصايح اللى بنقدمهالك:

    - قدمى لطفلك ميه كتير وعصاير "لو كان بدأ يتناولهم"
    - بالنسبة للأكل حاولى الأكل يكون مهروس عشان يكون سهل الهضم والإخراج
    - لو الحالة استمرت كذا يوم ولسه طفلك بيعانى ممكن تستخدمى لبوس الجلسرين لكن ماتسرفيش فى استخدامها خليها حل بعيد لو استمرت الحالة.

    فيه بعض الأسباب النادرة اللى ممكن تسبب للطفل الأمساك المزمن: زى مشاكل الغدة الدرقية "نقصها" أو مشاكل فى القولون، علامة خطر أو قلق لو الأمساك مصاحب بدم استشيرى طبيبك على طول.



  6. الاسهال:
    الأسباب ممكن تكون: لو حسيتى أن البراز بتاع الطفل سائل أو أن معدل إخراج البراز زايد عن الطبيعى فده ممكن يكون معناه أن الطفل بيعانى من الاسهال
    - عدوى فيروسية أو بكتيرية أو طفيلية
    - حساسية من الأكل
    - ممكن تكونى قدمتى لطفلك كمية كبيرة من العصاير "الجهاز الهضمى للطفل مابيكونش مكتمل النمو وقدرته على هضم السكريات مبتكونش بشكل كامل"

    يمكن أكتر حاجة بتقلقنا فى الاسهال أن الطفل ممكن يفقد كمية كبيرة من سوائل ومعادن الجسم وممكن يسببله الجفاف.


    أعراض الجفاف بتكون:
    - جفاف الفم
    - عينه داخله لجوه
    - لما بيعيط مفيش دموع
    - التبول قل عن الطبيعى

    الأطباء مابينصحوش بإستخدام مضادات الأسهال لكن ممكن يوصفوا مضاد حيوى فى حالة التأكد من أن السبب هو عدوى بكتيرية. وممكن يتوصف مضادات الجفاف فى حالة أن طفلك دخل فى حالة جفاف.

    لو الطفل بيتناول الطعام يفضل أنك تقللى من أنك تقدميله الأكل اللى فيه ألياف كتير أو الألبان والجبن أو الأكل العالى الدهون والحلويات أو السكريات. واستبدليه بأكل ممسك زى الموز والرز وغيره من النشويات.

    ولو أنتى بترضعى طفلك حاولى فى غذائك أنك تبعدى عن الأكلات اللى ممكن تسبب الأسهال لأن اى حاجة بتتناوليها بتنزل مع اللبن لطفلك وممكن تكون هى ببساطة سبب الاسهال عنده.


  7. التهاب الأذن:لو حصل تجمع للسوائل فى الأذن الوسطى ده ممكن يكون وسط ملائم للبكتيريا وممكن يسبب التهاب وعدوى الأذن.

    الأعراض:
    - ممكن تلاقى طفلك بيعيط كتير وممكن تلاقيه بيشد ودنه ده معناه أن فيه ألم فى الأذن.
    - استشارة الطبيب مطلوبة لأن الألم ممكن يكون مصاحب لنزلة برد عادية أو يكون فعلا فيه عدوى وتتطلب العلاج وممكن الطبيب يكتب مضاد حيوى "عند الحاجة".
    - التكرار فى حدوث عدوى والتهاب الأذن ماتتهاونيش فيه لأنه لاقدر الله ممكن يسبب مشاكل فى السمع بعد كده للطفل.

  8. الحمي:

    ارتفاع درجة الحراره للطفل أسبابه كتير، ممكن لعدوى فى اى مكان فى الجسم بداية من عدوى للجهاز التنفسى أو الجهاز الهضمى، الأذن أو لا قدر الله للمخ أو الأغشية المبطنة للمخ.

    وعشان كده الحمى نفسها لازم ندور على السبب وراها واحنا بنعالجها.

    بس كمان ارتفاع درجة الحرارة نفسه مؤذى للطفل وممكن يسبب مشاكل فى المخ ولو ماتعاملتش معاه بشكل سريع ممكن لاقدر الله يؤدى لمشاكل بعيدة المدى من تأخر فى النمو العقلى وغيره.


  9. مشاكل التسنين:

    يمكن الفترة دى بتكون تقيلة عليكى وعلى طفلك، بيبقى بيعيط كتير ومكن يصحى من النوم من الألم. اللثة عنده بتكون مورمة وملتهبة والأعراض بتبدأ من 3 ل 5 أيام قبل السِنّة ما تظهر وتنتهى مع ظهور السِنّة بره اللثة.

    فيه أعراض كتير يمكن شائع بين الأمهات أنها مصاحبة للتسنين زى الحمى أو الاسهال أو الطفح الجلدى لكن بصراحة جديد الدراسات بتقول أن ده ممكن يكون مصاحب بشكل بسيط جدا!

    وأن لو طفلك بيعانى من الأعراض دى اتأكدى أن مفيش سبب تانى غير التسنين الأول.

    ممكن فى الفترة دى تحاولى تدلكى اللثة بتاعته لأن ده بيريحه ويخفف الألم وممكن تستخدمى المنتجات زى "العضاضة" بس المهم أنك تتأكدى من أنها مصنعة من مواد غير ضارة. وأخيرا جيل الأسنان مابينصحش بيه.


Image Ads

التعليقات

fff