اتصل بنا

ازاى تعيش مع مرض السكر بسلام

diabetes
مرض السكر يعتبر من الأمراض المنتشرة بشكل كبير بينا، وأكيد كل واحد فينا يعرف حد أو هو نفسه مريض بالسكر.

ولأنه منتشر، ولأن بالسيطرة عليه هتقدر تحمى نفسك من مضاعفاته الكتير واللى بعضها خطير، لازم تعرف وتقرأ كتير عنه .. واحنا حبينا نقدملكم المعلومات اللازمة.

مرض السكرى بيجمع عدد من الأعراض والمضاعفات تحتيه بيسببها زيادة نسبة الجلوكوز "السكر" فى الدم. الجلوكوز مهم لصحة الأنسجة وهو الغذاء الأساسى للمخ.

بأختلاف نوع مرض السكر وأختلاف سبب المرض الناتج أن فيه نسبة كبيرة من السكر فى الدم واللى ممكن تؤدى لمضاعفات خطيرة.

بشكل عام مرض السكر فيه النوع الأول "Type 1" والتانى "Type 2" وفيه مرض السكرى مع الحمل وده فى الأغلب بينتهى مع الولادة، وفيه نوع ما قبل السكرى "prediabetes" وده مش المرض نفسه ولكن ما قبل المرض بمعنى أن نسبة السكر فى الدم عالية عن الطبيعى لكن ماوصلتش لنسب المرض.

تعالوا نعرف ايه هى أعراض مرض السكرى:
الأعراض بتختلف بأختلاف نسبة السكر فى الدم، ولأن فى النوع التانى نسبة السكر بتكون مش عالية أوى، فى بداية المرض ممكن متظهرش أعراض فى البداية على المريض. على عكس النوع الأول واللى ممكن أول ظهور يحصل للمرض بحصول غيبوبة سكر وده لأن نسب السكر فى الدم مع النوع ده بتكون عالية زى ماهنعرف بعد كده.
الأعراض:
- العطش المستمر
- الحاجة المتكررة للتبول
- الجوع الشديد
- نقص للوزن غير متعمد
- وجود الكيتون فى البول "وهى نتايج تكسير العضلات والدهون فى عدم وجود انسولين"
- الأرهاق
- التوتر
- العدوى المتكررة خصوصا للجلد وصعوبة التئام الجروح
بالرغم من أن النوع الأول أو التانى ممكن يظهروا فى أى سن،الا أن الأغلب ظهور النوع الأول بيكون فى مرحلة الطفولة أو المراهقة. أما النوع التانى وهو الأكثر شيوعاً غالباً بيظهر بعد سن الأربعين.

طيب امتى أحتاج أروح للدكتور؟
فى حالة أنك شكيتى بوجود الأعراض دى على طفلك أو أنك أنت/ى حسيتى الأعراض دى عندك. أو فى حالة تشخيص مرض السكر وده للمتابعة المستمرة عشان تفضل نسبة السكر فى الدم بمعدلات معقولة.

مرض السكر بيحصل ليه وازاى؟ وايه هى العوامل المساعدة لظهوره؟ تعالوا نفهم...
كلنا عارفين أن مرض السكر سببه نقص هرمون الأنسولين فى الجسم. وعشان نفهم أكتر مرض السكر محتاجين نعرف اكتر عن الأنسولين وكيفية استخدام الجسم للسكر.

الأنسولين:
بيتم افرازه من البنكرياس وله وظائف كتير بس يمكن اللى يهمنا نعرفه فى كلامنا عن مرض السكرأنه بيساعد على دخول السكرمن الدم للخلايا وبالتالى بيقلل نسبته فى الدم وبيتم استهلاك السكر داخل الخلايا لأنتاج الطاقة اللازمة لمختلف وظايف الجسم.
أما السكر واللى زى ما قلنا هو طاقة الجسم، فالجسم بيحصل عليه من الطعام أو بيتم تصنيعه فى الكبد وبيتم تحريره فى الدم ومنه الى الخلايا "ودى وظيفة الأنسولين".
الكبد يعتبر مصنع للسكر وكمان مخزن "بيتم تخزينه على هيئة جليكوجين" بمعنى أن الكبد بيخزن السكر عنده وبيحرره عند الحاجة.
وبالتالى فى وجود نسب قليلة من السكر فى الدم "زى مثلاً فى حالة أنك مش واكل كويس" الكبد بيكسر الجليكوجين اللى عنده ويخرج جلوكوز فى الدم عشان ترجع لمعدلاتها الطبيعية والخلايا تستفيد منها.

النوع الأول "Type 1":
سببه مش مفهوم بالكامل لكن المعروف أن فى الحالة دى جهاز المناعة للأسف بيهاجمخلايا البنكرياس اللى بتفرز الأنسولين وبتدمرها،والناتج عنها أن الأنسولين بيفرز فى الجسم بنسبة ضئيلة أو مش بُيفرز أصلا. وبالتالى بدل السكر مايدخل فى الخلايا بيتراكم فى الدم. كمان الجينات أثبت لها دور فى المرض.
العوامل المساعدة:
- التاريخ العائلى: بتزيد نسبة الأصابة لو الأب أو أحد الأخوات مصاب.
- عوامل بيئية: زى التعرض لعدوى فيروسية بتعتبر حافز لظهور المرض.
- الأجسام المضادة: وجود أجسام مضادة لخلايا البنكرياس بتتسبب فى تدميرها.

النوع التانى "Type 2":
المشكلة هنا ان خلايا البنكرياس بتفرز أنسولين طبيعى بس فيه مقاومة من الخلايا لعمل الانسولين، ده بيؤدى أن نسبة السكر تفضل عالية فى الدم، فخلايا البنكرياس بيوصلها أن الأنسولين قليل "وده مش حقيقى" فبتحاول تفرز أنسولين أكتر عشان تتغلب على المشكلة دى. فى النهاية خلايا البنكرياس بتُجهد وتتعب وماتقدرش تفرز انسولين كافى.
برضه بيرجح ان الجينات لها دور قوى فى النوع التانى وكمان زيادة الوزن مرتبطة بشكل قوى بالنوع التانى من مرض السكر.
العوامل المساعدة:
- الوزن: كل مازادت الخلايا الدهنية كل مابتزيد المقاومة ضد الأنسولين
- الحياة الكسولة: لأن الرياضة بتساعد على استخدام الجلوكوز وبتحسن حساسية الخلايا للأنسولين
- التاريخ العائلى للمرض
- السن: عادة بيظهر فى السن بعد ال40
- سكر الحمل: السيدات اللى بيحصلهم سكر حمل بيبقوا عرضة بعد كده للاصابةبالنوع التانى لمرض السكر
- ارتفاع ضغط الدم وزيادة نسبة كوليسترول الدم

مضاعفات مرض السكر:
مضاعفات المرض بتعتمد على عاملين مهمين؛ الأول مدة الاصابة بالمرض يعنى بقالك قد ايه بتعانى من مرض السكر "الفترة الزمنيه".
العامل التانى هو السيطرة على المرض وهى بمعنى الألتزام بالعلاج ونجاح العلاج فى تخفيض نسبة السكر فى الدم لمعدلات معقولة.
1. مضاعفات للقلب والجهاز الدورى:
بيزيد للأسف بشكل كبير خطر الأصابة بالذبحة الصدرية والجلطة وامراض القلب المختلفة.
2. تدمير الأعصاب:
زيادة السكر فى الدم بتدمر الشعيرات الدموية اللى بتغذى الأعصاب خصوصا للرجل فبينتج تنميل وألم فى الرجل ممكن ينتهى بنقص او فقد الأحساس فى الرجل.
كمان تدمير أعصاب الجهاز الهضمى ممكن تنتج غثيان، اسهال أو ترجيع.
3. مشاكل للكلى:
الكلى بتحتوى على ملايين الوحدات اللى بتعتبر فلتر للتنقية وطرد المواد الضارة،مرض السكر بيدمرها وممكن ينتهى الحال بالفشل الكلوى وغسيل الكلى.
4. تدمير شبكية العين:
ممكن يؤدى للأصابة بارتفاع ضغط العين أو الميه الزرقا وممكن ينتهى بفقد النظر.
5. القدم السكرى:
من أشهر مضاعفات المرض وسببها نقص الأحساس فى القدم مع زيادة العدوى فيها وصعوبة التئام الجروح ونقص جريان الدم فيها ودى لللأسف ممكن تنتهى بالغرغرينة وبتر الطرف.
6. كمان ممكن تؤدى لمشاكل فى الجلد زى التصبغ أو الأحساس بالحكة.
7. مشاكل فى السمع وتطور مرض اللألزهايمر.

سكر الحمل "Gestational Diabetes":
مع الحمل بيتم أفراز هرمونات معينة بتعاكس شغل الأنسولين وتسبب مقاومة له، فى الطبيعى أن البنكرياس بيفرز نسب أعلى من الأنسولين عشان يغطى على المقاومة وبينجح فى كده.
بس فيه حالات البنكرياس بيفشل أنه يقدم كمية كافية من الأنسولين وبالتالى بتظهر أعراض مرض السكر طول فترة الحمل وفى الغالب بتختفى بعده.
العوامل المساعدة:
- السن: الحمل بعد 25 سنه
- التاريخ العائلى للمرض: لو حد من أقارب الدرجة الأولى عنده أو السيدة دى حصلها سكر حمل فى حمل سابق بتكون أكتر عرضة للأصابة
- الوزن الزائد

مضاعفات سكر الحمل:
مشاكل للجنين:
- النمو الزائد:السكر الزائد اللى هيوصل للجنين من الأم عن طريق المشيمة هيحفز إفراز الأنسولين من الجنين "وهو هرمون بنائى بيزود بناء العضلات والدهون فى الجسم" وده هيصعب عملية الولادة الطبيعية وغالبا هنلجأ للولادة القيصرية.
- انخفاض سكر الدم: بعض الأطفال بعد الولادة بترجع نسبة السكر فى جسمهم للطبيعى لكن إفراز الأنسولين عالى فبيسبب انخفاض لنسبة السكر فى الدم.
- التعرض للأصابة بمرض السكر: غالبا النوع التانى من مرض السكر لاحقا فى حياته وكمان عرضة لأصابتهم بالسمنة.
مشاكل للأم:
- تسمم الحمل:بتتمثل فى ارتفاع ضغط الدم للأم ووجود زلال فى البول وقد تؤدى الى مضاعفات خطيرة للأم وللجنين
- ممكن يتطور بعد كده للنوع التانى من مرض السكر
Image Ads

التعليقات

fff