اتصل بنا

أمراض القلب

heart

كتير مننا أتعرض ان حد من أهله يعانى من مرض فى القلب أو هو شخصياً وللأسف انهارده مفيش بيت بيخلى من مرض الضغط واللى بيعتبر واحد من أهم أسباب أمراض القلب لو ماتعالجش بشكل سليم ولأن القلب هو موسيقار الجسم ولأنه يعتبر أهم عضو، تعالوا نقرب انهاره منه أكتر ونحاول نفهم ازاى بيشتغل وايه الأمراض اللى بتصيبه وأعراضها وازاى أقدر أحمى نفسى من الأمراض دى

تعالوا معانا فى رحله قصيره

القلب هو مضخة الدم للجسم كله والمسئول عن تغذية جميع أعضاء الجسم، هو عضو عضلى بحجم قبضة اليد وموجود فى منتصف منطقة الصدر مسئوليته انه ياخد الدم المحمل بالأوكسجين من الرئتين للجسم كله ودى وظيفه الجانب الأيسر من القلب أما الجانب الأيمن وظيفته انه يستلم الدم الغير صالح من جميع أنحاء الجسم ويوصله للرئتين عشان تحمله بالأوكسجين ودى هى الدوره الدمويه.

القلب بيتكون من أربع حجيرات: أذين أيمن وأيسر وبطين أيمن وأيسر

والقلب فيه 4 صمامات:
الجانب الأيمن فيه الصمامين الثلاثى "مابين الأذين والبطين الأيمن" والرئوى "فى بداية الشريان الرئوى"
الجانب الأيسر فيه الصمامين المترالى "مابين الأذين والبطين الأيسر" والأورطى "فى بداية شريان الأورطى"

ضربات القلب:
ودى عباره عن مرحلتين:
مرحله انقباض عضلة القلب ودى المرحله اللى بيتم فيها ضخ الدم للرئتين "من الجانب الأيمن " وللجسم "من الجانب الأيسر"
ومرحله الراحه وهنا القلب بيستقبل الدم من الرئتين والجسم
والمرحلتين بيتتابعوا بشكل مستمر
نبضات قلب الانسان الطبيعى منظمه ومابين 75 لـ 90 ضربة فى الدقيقة

الجهاز الكهربى للقلب: وده الجهاز اللى بينظم ضربات القلب، النبضة الكهربية بتبتدى من الأذين "الحجرتين العلويتين من القلب "وبتمتد عن طريق جدار القلب للبطين "الحجرتين السفليتين للقلب "

ده بشكل عام القلب وطريقة عمله

تعالوا بقى نشوف ايه الأمراض اللى ممكن تصيب القلب وأعراضها وأهم أسبابها

مصطلح أمراض القلب بيوصف مدى واسع من الأمراض، كمان بتشمل تحتها أمراض ضيق الشرايين وغيرها وكتير منها ممكن نمنع حدوثه:

  1. ضيق وتصلب الشرايين (atherosclerotic disease): و هو المرض الأشهر للقلب والأكثر حدوثا بين أمراض القلب

    الشرايين بتعانى من ترسيب مواد فى جدارها زى الكوليسترول، واللى وبيسبب ضيقها وبيخليها جامده وصعب توسيعها وده بيسبب نقص فى كمية الدم اللى بتوصل للمخ وباقى أجزاء الجسم بترتبط العمليه دى بشكل كبير بالسن لكن ده مايمنعش أن طريقة الأكل الغلط للأكلات عاليه الكوليسترول بيسرع العمليه دى فى سن أصغر

    الأعراض:
    - ألم فى الصدر
    - ضيق النفس
    - ألم وتنميل فى الأطراف "هنا فى حاجه نحب نوضحها ان مع نقص الدم للأعضاء المهمه فى الجسم زى المخ والقلب والرئه والكلى الجسم بيعمل اعاده توزيع للدم blood redistribution بمعنى بتضيق الشرايين للأطراف وتوسع الخاصه بالأعضاء المهمه بحيث توفر دم أكتر للأعضاء المهمه ، وده سبب الأعراض هنا مع كمان ضيق شرايينها تبعا للحاله العامه للجسم فى الحاله دى"
    - ألم فى الرقبه المعده والفك


  2. الأمراض الخاصه بخلل ضربات القلب (heart arrhythmias): هنا المشكله أن القلب ضرباته سريعه أو بطيئه أو غير منتظمة ده خلل ممكن يكون فى بداية الضربة او فى انتشارها وتوصيلها من الأذين للبطين مثلاً مع المجهود طبيعى ان القلب بيزود عدد ضربات القلب عشان يحاول يوصل دم أكتر يساعدك على المجهود اللى بتعمله لكن اللى مش طبيعى أنك تكون بشكل دائم واحيانا فى أوقات مابتعملش فيها مجهود تكون ضربات قلبك سريعة أو غير منظمة أو ممكن فى حالات تكون بطيئة

    الأعراض:
    - رفرفة فى الصدر
    - ضربات قلب سريعة/ بطيئة
    - ألم فى الصدر وضيق نفس
    - الاعياء والاغماء


  3. أمراض الخلقية ( congenital heart defects): و دى الأمراض اللى سببها عيوب خلقية واللى ممكن تظهر أعراضها بعد الولادة مباشرة أو فى خلال سنوات الطفولة أساس حدوثها غالباً بيكون فى المرحله الأولى من الحمل "أول 3 شهور" وهى مرحلة تكوين الجنين وتكوين أعضائه بيكون خلل فى جينات، أو أحياناً الأم بتكون أخدت أدوية سببت ده - عشان كده مهم الأم الحامل ماتاخدش أدوية بدون استشارة الطبيب ولو حتى مسكن للصداع - كمان ممكن بعض الحالات المرضيه للأم تسبب بعض التشوهات للجنين

    الأعراض:
    - وش الطفل بيزرق "فيه اختناق" خصوصاً مع الرضاعه
    - تورم فى الرجل أو انتفاخ البطن
    - فى الأطفال أقل من سنتين صعوبة فى التنفس ونموه بيقل


  4. أمراض بسبب ضعف عضلة القلب (cardiomyopathy): بأنواعها المختلفه أسبابها ممكن تكون ضغط الدم العالى أو أمراض الصمامات لكن بتبقى على المدى البعيد وفيه منها أنواع موروثة أن عضلة القلب بطبيعتها متضخمة هنا عضلة القلب بتكون متصلبة وبيكون انقباضها لضخ الدم أصعب فى المراحل الأولى بيكون مفيش أعراض لكن مع تقدم الحاله بتكون

    الأعراض:
    - صعوبة التنفس بعد مجهود قليل
    - ارهاق واغماء
    - تورم فى الرجلين
    - عدم انتظام فى ضربات القلب


  5. أمراض بسبب التهاب وعدوى فى القلب (heart infections): ممكن تسببها الفيروسات أو البكتريا أو حتى الفطريات "لكن هنا الحاله بتطلب ضعف شديد فى مناعة المريض وضعف فى القلب لأنها بطبيعتها كائنات ضعيفه جداً بتسبب أمراض معظمها جلدية"

    وهم 3 أنواع من طبقات القلب اللى بيتأثروا:
    - التهاب التامور وهى الطبقه المغلفه للقلب والوسط المحيط للقلب "Pericarditis"
    - التهاب عضلة القلب ”Myocarditis”
    - التهاب الطبقة المبطنة للقلب واللى بتغطى كمان صمامات القلب”Endocarditis”

    الأعراض:
    - الحمى
    - صعوبة فى التنفس
    - ارهاق أو تعب
    - تورم فى الرجلين أو البطن
    - كحة ناشفة
    - خلل فى نظام ضربات القلب
    - طفح جلدى


  6. أمراض تصيب صمامات القلب (valvular heart disease): صمامات القلب هى المترالى والأورطى "فى الجانب الأيسر من القلب" الصمام الثلاثى و الصمام الرئوى "فى الجانب الأيمن من القلب "
    الأضرار فيهم ممكن تسبب توسيع للصمامات دى أو ضيق فيهم وده هيسبب اما ارتجاع للدم منهم أو صعوبه ضخه خلالهم وده هسيبب حمل على عضلة القب مع الوقت

    من ضمن أشهر الأسباب دى: الحمى الروماتيزمية وبعض أمراض التهاب وعدوى القلب

    الأعراض على حسب الصمام المصاب لكن بوجه عام الأعراض هى:
    - ارهاق وضعف واغماء
    - ضيق فى التنفس وخلل فى ضربات القلب
    - ألم فى الصدر

مضاعفات أمراض القلب:

  1. الفشل القلبى: واحد من أشهر الأمراض وهنا القلب بيبقى فشل انه يضخ كمية من الدم الكافى لجميع انحاء الجسم
  2. السكته القلبية: دم تجلط بيقفل شريان مغذى للقلب فبيمنع وصول الدم للقلب نفسه لتغذيته عشان القلب يقدر يشتغل
  3. السكتة الدماغية: هنا الشرايين المغذية للمخ بيحصل فيها ضيق شديد أو تجلط وبيسبب منع وصول الدم لمناطق فى المخ
  4. انتفاخ فى منطقة من الشرايين (An Aneurysm): وده بيكون عبارة عن أن جزء من الشريان بينتفخ على شكل دائرى بسبب ضغط الدم الشديد وانفجاره بيكون مسألة طوارئ

مهم نعرف ان غير الأسباب الأساسية فيه بعض العوامل اللى بتساعد على حدوث المرض وهنا العوامل المساعدة او ممكن نسميها الأخطار:

  1. السن: تقدم السن من العوامل القويه - مع بعض الاستثناءات زى العيوب الخلقية - سببه ضيق الشرايين أو ضعف عضلة القلب
  2. النوع: الرجاله بشكل عام أكتر عرضة والسيدات ما بعد سن اليأس
  3. التاريخ العائلى: لو المرض موجود وأصاب أفراد من العائلة ده ممكن يخليك أكتر عرضة للاصابة بالمرض
  4. التدخين: النيكوتين فى السجاير بيسبب ضيق الشرايين و أول أوكسيد الكربون بيدمر الطبقة المبطنة للشرايين، كمان الاحصائيات بتقول ان نسبة الاصابه للمدخنين أعلى من غير المدخنين
  5. سوء التغذية: وهنا مش المعنى قلة الكمية ولكن نوع الغذاء نفسه، يعنى بيحتوى على نسبة عالية من الدهون، الملح، السكر أو الكوليسترول
  6. ارتفاع ضغط الدم: اللى مش بيتعالج بشكل سليم بيسبب ضيق وتصلب فى الشرايين
  7. ارتفاع نسبة الكوليسترول فى الدم
  8. مرض السكرى
  9. السمنة
  10. قلة النشاط والحياة الخاملة
  11. التوتر
  12. قلة النظافة: ودى بتكون من أسباب أمراض عدوى القلب

فى بعض العوامل اللى ممكن نتجنبها زى التدخين أو سوء التغذيه لكن فى بعض العوامل مش بإيدنا زى السن مثلاً النوع الأول هو اللى بنحاول نلعب عليه عشان نقلل نسبة تعرضنا للأصابة بأمراض القلب

أمراض القلب عامة علاجها بيكون أسهل وأفضل كتير لو اكتشفناها بدرى. لو حاسس أنك عرضة لأمراض القلب أو فيه تاريخ للمرض فى العائلة يفضل أنك تبلغ طبيبك وتحاول تقلل العوامل اللى ممكن تساعد على حدوث أمراض القلب

طيب دلوقتى أنا عايز أخلى قلبى صحى وسليم بس مش عارف أعمل ايه؟
أولا مهم تعرف أنك مش محتاج تعمل حاجه كبيره لأن حتى التغيير البسيط أوى بيبقى له فايدة كبيرة أوى على قلبك
من ضمن أكبر الأخطار على القلب الحياه الكسوله واللى بتفتقر للحركة والنشاط

طيب خطه بسيطه أوى ممكن تعملها عشان تبدأ التغير فعلا الخطه دى اسمها
"كل5 - أتحرك 10- نام8"يعنى ايه؟
كل 5: كل 5 من الفواكه والخضار يوميا ممكن تبدأ انك تأكل مع الفطار وممكن كـ سناكس بين الوجبات غير السلطه طبعا فى الغداء
اتحرك 10: أبدأ بأنك على الأقل 10 دقايق يوميا تلعب فيهم رياضة، طبعا الدراسات بتقول 30 دقيقه على الأقل بس دى ممكن تكون بداية كويسة وبالتعود زود الـ 10 لـ 30 دقيقه وهكذا، انك تبدأ بطئ وتعلى أفضل من انك تبدأ بسرعة وتقف بعد كده
نام 8: حاول تنام 8 ساعات يوميا نوم جيد ومريح من غير قلق

زى ما اتفقنا لو أنت قلقان يفضل انك تراجع طبيبك وتحاول تظبط الضغط والسكر وتقلل نسبة الكوليسترول فى الدم
كمان فيه أغذيه مفيده للقلب منها : (السالمون- السبانخ - البنجر - الأفوكادو - البصل الأحمر والكسبره) وغيرها

طيب لو انت مريض قلب:
علاج أمراض القلب بيختلف ما بين تغيير نظام حياتك للأفضل زى الأكل الصحى والتمارين البسيطه "لكن لازم تراجع طبيبك فى أنواع التمارين لان المجهود الزيادة مش كويس" ودى ممكن تكون خطوة كافيه للسيطرة على أعراض المرض وعلى تطوره

الأدوية: وده فى حالة ان الخطوة الأولى مش كافية نوعية الأدويه بتختلف باختلاف المرض وطبعاً طبيبك هو اللى بيكتبهالك
الجراحه أو التدخلات الطبية: بتكون الحل فى بعض الحالات وفى بعض الأمراض زى القسطرة لتوسيع الشرايين وممكن التوسيع الجراحى لبعض الصمامات

كده احنا عرفنا أكتر وقربنا من القلب وعرفنا ايه اللى ممكن يتعبه وايه اللى بيساعده يكون صحى
القلب عضو جسدى وكمان روحى والراحة النفسية مهمة له جداً
قلبنا يستاهل اننا نهتم بصحتنا واكلنا ونغير حياتنا عشان يكون سليم وصحيح

سهل أنك تحمى نفسك أو تقلل نسبة تعرضك لأمراض القلب قلبك مابيبخلش عليك شغال طول الوقت بكل طاقته عشان صحتك وصحة جسمك ماتبخلش انت على نفسك وعلى صحتك واهتم بيه وابدأ التغيير

Image Ads

التعليقات

fff