اتصل بنا

النظام الغذائي لمرضي السكر

diet-for-diabetics

فيه علاقة قوية جدأ ما بين مرض السكر ونظامك الغذائى.

بالرغم من أن "السكر" مش هو سبب مرض السكر، والسبب الحقيقى هو أجسام مضادة بتكسر خلايا البنكرياس اللى بتفرز الأنسولين "النوع الأول" أو مقاومة الخلايا لعمل الأنسولين "النوع التانى" لكن الناتج النهائى هو زيادة نسبة السكر فى الدم واللى عليه بتحصل كل الأعراض والمضاعفات.

كمية السكر اللى بتدخلها للجسم بتستنى أنه يتعامل معاها بطريقة طبيعية فى حين أن الجسم عنده مشكلة حقيقية، بالتالى مع علاجى للسبب الأساسى مهم أنى أساعد بتظبيط تناولى للأكل اللى فى النهاية هيأثر على نسبة السكر فى الدم.

كمان تنظيم الوزن وخسارة الوزن بتحسن حساسية الخلايا للأنسولين، مش بس كده التمارين الرياضية بتساعد الجسم أنه يدخل الجلوكوز للخلايا ويستخدمها وبالتالى بيقلل نسبته فى الدم.

النظام المثالى لمريض السكر أنه ياكل 3 وجبات رئيسية فى اليوم وتظبيطها مع العلاج + 3 سناكس بين الوجبات واللى بتكون فاكهة أو خضار أو حاجة بسيطة.

والغرض من السناكس أو الوجبات الخفيفة أن الجسم يكون فيه دايماً نسبة من السكر فى الدم موجودة لأن الأدوية اللى بيتناولها مريض السكر بيستمر مفعولها لفترة طويلة ف عشان أضمن انها متسببش فى نقص السكر فى الدم بشكل خطير "وقد يؤدى لغيبوبة أو حتى الوفاة".

بعكس المتخيل مفيش نظام محدد المفروض يمشى عليه مريض السكر يعنى مش هيعمل دايت أو ريجيم، لأن الجسم بيحتاج كل أنواع الأكل لكن المطلوب من مريض السكر أنه يكون أكتر حكمة فى اختيار الأكل أو كميته.

تعالوا دلوقتى نستعرض أنواع الأكل المختلفة ونعرف ايه المفضل فى كل نوع وايه الأفضل أنك تبعد عنه.

الكربوهيدرات:

الأفضل:
  • الحبوب الكاملة زى الشوفان والرز البنى
الأسوء:
  • الأرز الأبيض
  • العيش الأبيض
  • البطاطس المحمرة

الخضراوات:

افتكر الأول أن البطاطس كربوهيدرات مش تحت بند الخضراوات، ولكن الخضار بالألياف اللى هو غنى بيها مفيد جداً.

الأفضل:
  • الخضار الفريش أو ممكن مشوى
الأسوء:
  • المخلل "لو كان مع السكر ارتفاع ضغط الدم أو مرض فى القلب"
  • الخضراوات المطبوخة بسمن أو مادة دهنية تقيلة

الفاكهة:

بتمد الجسم بالألياف والكربوهيدرات والفيتامينات.

الأفضل:
  • الفاكهة الفريش
الأسوء:
  • الفاكهة المعلبة
  • المربى
  • عصاير الفاكهة المحلاة

البروتينات:

الأختيارات فيها كتير زى اللحوم الحمراء، والفراخ والبيض والبقوليات والجبن.

الأفضل:
  • البقوليات
  • الأسماك
  • الفراخ
  • البيض
  • اللحوم ويفضل تكون قليلة الدهن
الأسوء:
  • اللحوم المحمرة
  • قطع اللحمة الدهنية زى الريش
  • الجبن المطبوخة

الألبان ومنتجاتها:

الأفضل:
  • اللبن الخالى الدسم
  • الزبادى قليل الدسم
  • الزبادى قليل الدسم
الأسوء:
  • اللبن كامل الدسم
  • الآيس كريم
  • الزبادى كامل الدسم

الدهون والزيوت:

صعب أن الواحد يقاومها وممكن تلاقى نفسك بتستهلكها بشكل كبير وبتسببلك زيادة كبيرة فى الوزن.

الأفضل:
  • لمصادر الطبيعية زى الدهون الموجودة فى الخضراوات أو المكسرات
  • الأكل اللى بيمدك بأوميجا 3 زى السالمون والتونة
الأسوء:
  • الأكل الغنى بالدهون المتحولة واللى بتكون موجودة وبكميات كبيرة فى الوجبات السريعة او الـfast food

المشروبات:

الأفضل:
  • المياه
  • القهوة والشاى قليلى أو بدون سكر
الأسوء:
  • المشروبات الغازية
  • القهوة اللى فيها مبيض أو creamer
  • الشاى مُحلى

نتمنى أننا نكون غطينا كل أنواع الأكل وكل المعلومات اللى محتاجين تعرفوها عن نظام الأكل مع مرض السكر ونتمنالكم الصحة والعافية دايماً.

Image Ads

التعليقات

fff