اتصل بنا

ملف كامل عن الرضاعة الطبيعية

breast-feeding

محدش يقدر يختلف على أهمية الرضاعة الطبيعية، وانهارده هنبينلك ازاى لبن الأم ما هو إلا اعجاز من إعجازات الخالق.

اللبن اللى بيتكون بإعجاز ومابيكلفكيش أى حاجة، وعلى الناحية التانية غنى بكل ما هو مفيد لصحة ونمو طفلك.

تعالى نبتدى القصة من الأول ..

بداية تكوين اللبن:

خلال فترة الحمل ثدى الحامل بيبدأ يتغير ويستعد لإفراز اللبن، وبتبدأ تزيد كمية البروتين، والأجسام المضادة واللاكتوز فى إفرازات الثدى. وفى بعض الحوامل ممكن ينزل قطرات من اللبن من الثدى فى خلال أشهر الحمل الأخيرة، لكن مستويات هرمونات الأستروجين والبروجستيرون العالية طوال فترة الحمل هى اللى بتمنع نزول اللبن.

المرحلة التانية واللى تقريباً بتبتدى مع الولادة وإزالة المشيمة "المفرز الأول لهرمون البروجيستيرون" اللبن بيبدأ يتدفق ويستعد للنزول. وإفراز اللبن بيخضع لسيطرة عدد من الهرمونات المنظمة فى الجسم.

فوايد الرضاعة الطبيعية كتيرة ليكى ولطفلك ودى بعضها:

  • الفوائد المناعية للبن:
  • أكتر وقت ممكن يستفيد فيه طفلك من الفوايد المناعية هو فترة لبن السرسوب "وده بيكون فى أول تقريباً 5 أيام من الولادة" يعنى ماتتأخريش فى رضاعة طفلك.
    1. لبن الأم غنى بالأجسام المضادة واللى تقدر أنها تقاوم العدوى أو البكتيريا فى جسم الرضيع وتقدمله حماية مجانية.
    2. كمان لبن الأم بيحتوى على بعض المواد اللى بتساعد جهاز المناعة انه يؤدى وظيفته زى:

    • مادة اللاكتوفيرن Lactoferrin واللى بتمسك فى الحديد بحيث تحافظ عليه من التكسير بالبكتيريا الضارة وتخلى الطفل يستفيد بيه.
    • دهون اللبن عندها القدرة على تدمير بعض الفيروسات.
    • مادة ال lysozyme واللى تقدر تقاوم بعض أنواع البكتيريا.
    • الأنترفيرون مادة مضادة للفيروسات.
    • ال mucin ودى مادة بتلزق فى الفيروسات والبكتريا وتجعلها أسهل للتعامل والقضاء عليها.

    3. غير كده كمان لبن الأم خصوصاً لبن السرسوب بيحتوى على نسب عالية من أنواع من كرات الدم البيضاء وبعض خلايا الجهاز المناعى واللى بتنتقل للطفل مع الرضاعة.

  • يمكن كمان الباحثين وجدوا أن الأطفال اللى بيحافظوا على الرضاعة الطبيعية بيكونوا أقل عرضة أنهم يصابوا بمختلف أنواع الحساسية.
  • الدراسات كمان أثبتت أنها بتخلى الأطفال بمعدلات ذكاء أعلى من الأطفال اللى اعتمدوا على الرضاعة الصناعية
  • بتقلل من معدل نسبة إصابة طفلك فيما بعد فى حياته بالسمنة.
  • يمكن فيه دراسات على نطاق كبير بتقول أنها كمان بتقلل إصابة الطفل بالموت المفاجئ "واللى للأسف بيصيب أطفال ومش مفهوم السبب بالكامل"
  • الأطفال اللى رضعوا طبيعى بيكونوا ناجحين اجتماعياً وواثقين من نفسهم
  • الرضاعة الطبيعية بتقلل التوتر أو تَعرُّضك لأكتئاب ما بعد الولادة
  • كمان بتحميكى من عدد من أنواع السرطان زى سرطان المبيض أو الثدى "بيقلل نسبة الاصابة"
  • بتقوى العلاقة بينك وبين طفلك
  • بتساعدك على فقد الوزن الزائد اللى اكتسبتيه طول فترة الحمل

امتى أبدأ أرضع طفلى؟

لو ينفع تبدأى ترضعى طفلك وأنتى فى غرفة الولادة أبدأى. لأن أفضل لبن هو اللبن السميك الأصفر واللى بيفرز فى أول كام يوم بعد الولادة أو زى ما بنسميه لبن السرسوب.
لو ابنك اتولد بدرى عن ميعاده أو لا قدر الله فيه حاجة استدعت دخوله الحضّانة ده يمكن يمنعك أنك ترضعيه بشكل مباشر.
لكن لأن لبنك فعلاً غالى فممكن فى الحالة دى بواسطة شفاطات معينة "ممكن تكون فى الحضّانة" بتجمعى اللبن وبيتناوله طفلك خلال اليوم بواسطة الممرضات المتخصصة وممكن يسمحولك أنك ترضعيه بنفسك فى زيارة يومية.

من الأسئلة اللى ممكن تراودك اذا كان لبنك كافى ولا لا؟

يمكن أنتى مش هتقدرى تعرفى قد ايه لبن بينزل أو طفلك بيرضع قد ايه، بس احنا ممكن نقدملك بعض الدلالات أن لبنك كافى:
- هتلاقى الثدى أنعم أو أطرى من قبل الرضاعة وده لأن طفلك فضاه من اللبن اللى بيخليه شبه جامد
- هتحسى أن طفلك بعد الرضاعة مرتاح وهادى
- طفلك بيزيد فى الوزن "بعد الولادة طبيعى أن الأطفال بيفقدوا وزن وبيرجعوا يكتسبوه تانى بعد أيام قليلة"
- لأن لبن السرسوب بيكون طبيعى قليل ممكن طفلك يغير الحفاضة مرتين لكن مع نزول اللبن بشكل كامل هتلاقيه ممكن يغير من 6 ل 7 مرات فى اليوم.

طيب امتى أشك أن اللبن مش كافى؟

- لو مابيزيدش فى الوزن أو بيقل
- بيغير الحفاضة أقل من 6 مرات
- لون البراز لسه غامق وقليل
- لون البول غامق "زى لون عصير التفاح" ده معناه أنه مركز وأن الطفل مابيحصلش على سوايل "لبن" بشكل كافى
- الطفل دايماً مضايق ومابينامش كسوي
- بياخد وقت كبير فى الرضاعة وبعدها كمان مابتحسيش أنه شبعان

كام مرة أرضع طفلى؟

بتختلف من طفل لآخر بشكل كبير، لكن فى المتوسط الطفل خلال الشهر الأول من الولادة بيحتاج رضعة تقريباً كل ساعتين لـ 3 ساعات أو بمعدل من 8 لـ 12 مرة فى اليوم.
ممكن تحسى أن كده كتير لكن افتكرى أن معدة الطفل بتكون صغيرة جداً فبيحتاج أنه يرضع كمية صغيرة فى كل مرة.
فى الشهر التانى ممكن 9 رضعات فى اليوم، والشهر التالت من 7 لـ 8 رضعات فى اليوم.
وبتقل مع العمر، بعد السادس بتكون الرضاعة مصاحبة لدخول الأكل للطفل وده بيخلى الرضعات تقل بشكل كبير "ممكن ندخل أكل من بعد الشهر الرابع".

مهم تعرفى أن أكلك بيأثر على اللبن بتاعك سواء أنه بينزل لطفلك وبيأثر عليه بالسلب أو الإيجاب أو ممكن يسبب زيادة لكمية اللبن أو يأثر على أفرازه.

طيب تعملى ايه:

  • احرصى على تناول أنك تتناولى وجبات بسيطة مع سناكس فى النص عشان دايماً يبقى جسمك فيه طاقة وقادر على إفراز اللبن
  • ماتحاوليش أنك تتبعى حمية شديدة عشان تفقدى وزن الحمل على الأقل أول شهرين من الولادة لأن ده هيأثر على لبنك
  • خلى أكلك صحى يحتوى على خليط من الكربوهيدرات، البروتين والدهون
  • حافظى على حبوب القمح الكاملة والفاكهة الطازجة
  • وماتنسيش الفاكهة والأغذية الغنية بالفيتامينات
  • اختارى أنواع الدهون المفيدة والصحية زى فى أسماك السالمون، الزيتون، زيت الزيتون والمكسرات
  • ابعدى عن الأكل الجاهز من بره أو ال fast food أنت مسئولة عن طفل معاكى
  • وأنتى بتختارى الخضار والفاكهة الأفضل تختارى اللى موجود فى الموسم بتاعه
  • الأسماك وما فيها من الأوميجا مهم للنمو العقلى للطفل
  • اشربى ميه وسوايل كتير
  • قللى الكافيين " قهوة، شيكولاتة، شاى، آيس كريم" لأنه ممكن يتجمع فى معدة طفلك ويكون صعب عليه التعامل معاه واخراجه وممكن يسببله الأرق أو غيره من المشكلات
  • ابعدى عن الأكل الحراق والبهارات التقيلة
  • بعض الأكلات زى البروكلى، والقرنبيط أو التوم لو اتناولتيها ممكن يسبب الغازات لطفلك فحاولى تتجنبيهم أو تقللى تناولهم
  • مهم جداً تعرفى أن التوتر والأرهاق بيأثروا بشكل كبير جداً على إفراز اللبن

بعض النصايح ليكى وأنتى بترضعى:

  • خليكى انتى وطفلك فى وضع مريح وهادىء
  • رضعى من ثدى والمرة التانية من الثدى الآخر "بدلى ما بينهم"
  • اتأكدى ان فم الطفل مغطى بشكل كامل حلمة الثدى "ده معناه أن وضعه سليم وهيقدر يمص بشكل أفضل"
  • خلى رأس الطفل أعلى من معدته "بيقلل مشاكل الغازات والتقلصات"
  • قبل ما ترضعى غمضى عينك وحسى بالراحة والأنسجام وبعدين ابدأى الرضاعه
Image Ads

التعليقات

fff