اتصل بنا

أورام المخ

heart

أكيد كلمة ورم مقلقة، ولو كانت في المخ كمان أعتقد كده الحكاية مرعبة.

بس مفيش حاجة مخيفة لو فهمناها كويس.

عشان كده اسمحولنا انهاردة نتكلم معاكم عن أورام المخ... أنواعها، أسبابها، أعراضها وإزاي بيتم تشخيصها وعلاجها

إيه هو ورم المخ؟

أورام المخ زي أي ورم تاني بينتج عن نمو خلايا غير طبيعية وبتكون كتلة. الأورام ممكن تكون أورام حميدة أو أورام سرطانية.

الأورام السرطانيةإما انها تكون "أولية" يعني أول مكان ينمو فيه السرطان هو المخ، أو تكون "ثانوية" ودي سرطانات المخ اللي بتنتج من انتشار السرطان من مكان تاني.

الورم بيختلف بشكل كبير في معدل نموه، والحقيقة حجمه ومكانه هما اللي بيحددوا المشاكل والأعراض اللي هتنتج عنه. كمان بيحددوا استراتيجيات العلاج اللي هتتحط للعيان.

إيه أعراض ورم المخ؟

زي ما قولنا، مكان الورم وحجمه هيحددوا الأعراض.

أعراض ورم المخ بتكون نتيجة لضغط الورم على مختلف مناطق ومراكز المخ. وبالتالي، العرض اللي هيظهر هيكون نتيجة هو الورم ضاغط على إيه.

  1. الصداع واللي بالتدريج بيكون أشد وبيتكرر أكتر
  2. الغثيان والقيء
  3. مشاكل في الرؤية(ممكن يحصل حَوَل جديد في العين أو الرؤية المزدوجة)
  4. نقص في أحساس الرجل أو اليد
  5. مشاكل في التوازن
  6. مشاكل في الكلام
  7. ممكن كمان يحصل تغيرات في السلوك أو الشخصية
  8. فقد السمع
  9. الصرع (لو المرض ظهر جديدماكنش المريض بيعاني منه قبل كده)

طب تعالوا نتعرف على أسباب أورام المخ:

نتأكد الأول انهم بينقسموا لأورام أولية(حميدة أو سرطانية)وأورام سرطانية(ثانوية)

الأورام الأولية:

وهي الأورام اللي بدايتها كانت في المخ بس هيكون على حسب الأنسجة اللي نما منها. ممكن يكون طلع من طبقات أغطية المخ“meninges”، من الأعصاب المخية، من الغدة النخامية أو من الجسم الصنبوري.

طبعاً الأورام بشكل عام بكل أنواعها وأماكن نموها أصلاً سببه تحول بيحصل في الحمض النووي للخلايا “DNA” واللي بيسمح للخلايا الغير طبيعية دي أنها تنمو بشكل مستمر وتنقسم وتتكاثر، في حين أن الخلايا الطبيعية ممكن تموت، وبينتج عن ده وجود ورم أو كتلة في المخ.

الأورام الأولية للمخ نسبة حدوثها قليلة جداً إذا قارناها بالأورام الثانوية في المخ (اللي بتظهر في مكان تاني وتنتشر في المخ)

تعالوا دلوقتي نتعرف على مختلف أنواع أورام المخ الأولية، سواءاالحميدة أو السرطانية:

الورم الدبقي"Gliomas": وهي الأورام اللي بتنمو من أنسجة وخلايا المخ أو النخاع الشوكي

الورم السحائي ”Meningioma”: أورام بتنمو من أغطية المخ والنخاع الشوكي(الأورام دي غير سرطانية)

ورم العصب السمعي “Acoustic neuromas (schwannomas)”: وهي الأورام اللي بتبدأ فيأعصاب السمع والتوازن وموصولة بالأذن الداخلية
- معلومة: الأذن الداخلية هي المسئولة عن التوازن، مش الوسطى زي ماهو شائع عند كتير من الناس

أورام الغدة النخامية“Pituitary adenomas”: ودي أورام غالبيتها حميدة،لكن مشكلتها أنها ممكن تأثر على إفراز هرمونات الغدة النخامية اللي لها تحكم تنظيمي لإفراز كتير من هرمونات الجسم المختلفة

ورم أرومي نخاعي “Medulloblastoma”: وهي أشهر أنواع الأورام السرطانية في الأطفال وبتنمو في الجزء السفلي من المخ وبتنتشر في سائل النخاع الشوكي. نسبة حدوثها في البالغين أقل، لكن بتحصل

ورم الاديم العصبي الظاهر الأولى “PNETs”: أورام سرطانية نادرة بتبدأ في مخ الجنين، وممكن تكون فيأي مكان في المخ

أورام الخلايا الجنسية “Germ Cell Tumors”: هي أورام بتظهر في الطفولة،في أماكن نمو المبيض (للأنثى) والخصيتين (للذكور)، لكن أحيانا بتظهر فيأماكن تانية زي المخ

أورام المخ الثانوية:

زي ما أتفقنا، هي الأورام اللي مكان نموها الأصلي كان في مكان تاني، لكن أنتشرت في المخ بعد كده. الأورام دي سرطانية(لأن الأورام الحميدة ماعندهاش القدرة على الانتشار في الجسم كل اللي تقدر تعمله انها تكبر في مكانها). نسبة حدوث السرطانات الثانوية أكتر بكتير جداً من الأورام الأولية.

أي سرطان في أي مكان ممكن ينتشر للمخ.

المخ ومعاه الرئة، الكبد والعظام هي أكتر الأماكن اللى بينتشر فيها السرطان (أي نوع)، ولكن من أشهر السرطانات اللي بتنتشر للمخ هي:
- سرطان الثدي
- سرطان القولون
- سرطان الكلى
- سرطان الرئة
- السرطان الميلاني(بيصيب الجلد في خلايا الميلانين وهي الصبغة المسئولة عن إعطاء الجسم لونه)

إيه اللي بيخلي الخلايا دي تتحول؟ بمعنى أخر،ليه السرطان بيحصل:

اكيد كلنا مايخفاش علينا اننا مانعرفش أيه هو بالتحديد سبب السرطان، لكن فيه عوامل قدرنا نثبت أنها لها دور في جعل الخلايا دي تتحول بشكل مباشر أو غير مباشر. وجود العوامل دي مش 001% هينتهي بالسرطان، لكن وجودها بيزود احتمالية الأصابة وبس.

العوامل في سرطان المخ هي:

السن: بشكل عام السرطان بتزيد نسبة الأصابة به في السن الكبير، كمان سرطانات المخ بتشترك في الصفة دي،لكن مابمنعش أن فيه أنواع من سرطان المخ خاصةفي الأطفال

التعرض للأشعة: الناس اللي بتتعرض للأشعة في خطر للأصابة، يمكن من ضمن الناس دي هما مرضى سرطانات في أماكن تانية اللي تحت العلاج الإشعاعي (هنا سرطان المخ مش بينتشر من مكان السرطان المعالج، لكن ظهر كعرض جانبي للعلاج الأشعاعي)

التاريخ العائلي: لو فيه حد في عيلتك جاله ورم في المخ أو فيه تحول في جينات معينة تورث ممكن تزود خطر الأصابة،لكن دي نسبة قليلة من المرضى

إزاي سرطان المخ بيتم تشخيصه؟

لو الطبيب شك أن فيه ورم في المخ، بيبدأ يقوم بفحوصات معينة من ضمنها:

الكشف العصبي: لأن المخ هو بداية كل أعصاب الجسم، وبالتالي الضغط عليه هينتج عنه ضغط على الأعصاب اللي طالعة منه. الدكتور هنا بيكشف ويتأكد أن اعصابك مش متأثرة، بيشوفالأحساس والحركة وكمان السمع والرؤية

الأشعة: أهم أنواعها هنا هي الأشعة المغناطيسية للمخ “MRI”، وهي اللي هتظهر لي الورم بسهولة.أحياناً بيتم حقن الأوردة بصبغة، واللي هتوصل للمخ عشان تصبغه في حين أن الورم مش هيتقبل الصبغةوهتكون رؤية الورم أوضح.
أحياناً فيه أشعه هدفها تشوف وظائف المخ المختلفة.
كمان فيه الأشعه المقطعيه على المخ “CT” وهي أقل أهمية من الـMRI.

فحوصات على مختلف أعضاء الجسم: والغرض منها أتأكد أن الورم مانتشرش في مكان تانى غير المخ،وأحياناً بتظهر أعراض الانتشار في المخ قبل أعراض الورم الأولي(وفي الحالة دي بنبقى عايزين نعرف ورم المخ هنا مكان نموه الأصلي فين).
الفحوصات دي ممكن تشمل أشعة مقطعية على الكبد أو الرئة، وأحياناً مسح ذري للعظام، زي ماقولنا الأماكن دي أشهر أماكن انتشار السرطان، لكن ممكن فحوصات تانية لو بدور على المكان الأصلي للسرطان ودي اللي هيحددها الطبيب.

عينة باثولوجية: وده بيتم في خلال عملية الاستئصال، بعد كده بتخضع للتشخيص الباثولوجي بالعين وتحت الميكروسكوب عشان أدرس الخلايا وطبيعتها ويتم تحديد أن كانت حميدة أو خبيثة.

بنحارب سرطان المخ إزاي؟

زي أي نوع تاني من السرطانات، العلاج بيتضمن 3 أستراتيجيات:التدخل الجراحي، العلاج الأشعاعي والعلاج الكيماوي. وخطة العلاج يا إما بنوع واحد أو اتنين أو الـ 3 مع بعض

التدخل الجراحي:
الحل ده هنا مش دايماً بيبقى ممكن تنفيذه، لأن المخ كله أماكن حيوية ودخول المشرط الجراحي فيه وإزالة جزء منه مش شيء بسيط. عشان كده الحل ده بنخليه للأورام الموجودة في أماكن ظاهرة أو سهل الوصول ليها من غير مانمس بأنسجة المخ المحيطة.
هنا ممكن يتم إزالة الورم بالكامل ان أمكن أو جزء منه، ده ممكن يساعد على تحسين الأعراض وبيقللها لأنه كده بيقلل الضغط شوية عن مراكز المخ.

من ضمن الاعراض الجانبية للجراحات:
- التلوث والعدوى
- النزيف
- المشاكل التانية بتبقى على حسب مكان الورم يعني مثلاً إصابة عصب السمع وينتج عنه فقدالسمع
طبعاً مفيش داعي للقلق، كل حاجة لها مخاطرها بس مش شرط أنها تحصل

العلاج الإشعاعي:
زي ماهو ممكن يكون سبب لسرطان المخ هو كمان علاج له.
الفكرة أن بيتم تسليط طيف من الأشعة على الورم لتدميره، يا إما بيتم تسليطهمن خارج الجسم أو في حالات نادرة جداً ممكن أوضع مصدر الأشعة قريب من الورم.
التسليط بيكون على الورم فقط أو على المخ كله (في حالات الانتشار في الجسم).

من الأعراض الجانبية:
الإرهاق والصداع وتهيج في فروة الرأس.

العلاج الجراحي الإشعاعي:
مش نوع مألوف من استراتيجيات علاج الأورام. الفكرة هنا أنه بيتم فتح المخ جراحياً وتسليط الأشعة مباشرةً على الورم. أكيد هنا الإشعاع بيكون بشكل مكثف وأقوى.
نوع الجراحات دي المريض فيها ممكن يروح بيته في نفس اليوم.

العلاج الكيماوي:
وهي الأدويةاللي هدفها تدمر خلايا السرطان. ممكن تتاخد عن طريق الفم أو يتم حقنها في الدم، وبتختلف الأدوية بأختلاف نوع الورم ومكانه.

من الأعراض الجانبية:
القيء والغثيان ووقوع الشعر.
أغلب الأعراض الجانبية هنا سببها أن الأدوية دي زي ما بتهاجم الخلايا السرطانية، للأسف فيه خلايا طبيعية هتتأثر وتدمر هي كمان.

اعادة الـتاهيل: لأن أورام المخ ممكن تأثر على المراكز الحسية، الحركية، السمع، الرؤيةأو حتى التفكير،بيحتاج المريض أحياناً لأعادة تأهيل وممكن لفترات طويلة.

العلاج الطبيعي: عشان المريض يقوي العضلات ومهارات الحركة(في حالة إصابة أعصاب الحركة)

التأهيل في العمل: العودة للعمل بعد أمراض المخ ممكن تكون محتاجة مجهود عشان يرجع تاني المريض يقوم بنفس الوظيفة أو التفكير،بيبقى محتاج رعاية ومحتاج وقت.

التخاطب: لو حصل تأثير على مركز الكلام في المخ، المريض بيحتاج علاج يبدأ بيه يحسن مهارات الكلام القديمة بتاعته.

الأطفال: طبعاً حالة خاصة ورجوعهم أو دخولهم للمدارس بعدها هيحتاج مننا رعايةومجهود، وده لأن أحياناً بيكون التفكير والذاكره بتاعتهم اتأثرت.وبالتالي، ممكن في المدارس كمان يحتاجوا رعاية خاصة، والمدرسة دورها مهم ولازم تشارك مع البيت في التأهيل.

لو انت مصاب بسرطان المخ...

أقرأ كتير عنه ده هيخليك قادر على محاربته والانتصار عليه.
كون قريب من عيلتك وأصحابك، لأنهم دعم كبير ومهم ليك.
أتكلم مع حد قريب منك عن مشاعرك ومخاوفك.
حاول تتواصل مع مرضى أخرين أو ناس نجت من سرطان المخ، دي دفعة كبيرة ومهمة جداً ليك في معركتك مع السرطان.

نتمنى تكون أنت الفايز في المعركة دي، وقريب جداً نسمع قصة هزيمتك للسرطان اللي هتحكيها للناس عشان تديهم أمل وتقولهم أنا هزمت السرطان!

Image Ads

التعليقات

fff