اتصل بنا

الحساسية

heart

الحساسيه مجرد كلمه لكن بيندرج تحتها مواد كتيره ومختلفه والعديد من الأمراض .. ودى هتكون رحلتنا انهارده.

ويمكن بتتلخص فكرتها فى أن الجهاز المناعى بيتعرف على ماده —فى الحقيقه هى غير مضرة—على أنها جسم غريب ويبدأ يدى رد فعل ويكون أجسام مضاده ضدها!

وبيتم افراز ماده الهيستامين كنتيجه وبتزيد نسبتها فى الدم وهى المسئوله عن أعراض الحساسيه المختلفه.

ومن أشهر المواد اللى ممكن الجسم يكون حساسيه ضدها:
- حبوب اللقاح – الغبار
- بعض الأكلات وأشهرها الألبان – السمك – الفول السودانى
- لسعة أو قرصة حشرة
- بعض الأدويه زى البنيسيللين
- بعض المواد لو لمستها بأيدك غالباً هتسبب أعراض جلديه

فى بعض العوامل لو عند شخص بتزود نسبة تكوين جسمه للحساسيه:
- التاريخ العائلى: لو فيه حد من الأسرة أو الأب أو الأم عنده أى نوع أو مرض من أمراض الحساسيه.
- لو الشخص نفسه عنده أى نوع أخر من الحساسيه زى الربو الشعبى أو غيره.
- الأطفال أكتر عرضه للتحسس من الكبار وفيه بعض أنواع الحساسيه بتختفى مع التقدم فى العمر.

الأعراض:
بتختلف الأعراض فى شدتها من شخص لأخر وكمان كمية الماده —الحساس منها— اللى اتعرضلها الشخص ده.
الأعراض ممكن تأثر على الجهاز التنفسى او الجلد او الجهاز الهضمى، أو تكون مجرد حكه أو أعراض بسيطه وممكن توصل لأعراض خطيرة تهدد حياة الشخص ده

واسمحولنا نقدم أمثله لبعض أمراض الحساسيه وأعراضها:
  • حساسية الأنف:
    بتكون سببها حساسية لحبوب اللقاح وغيرها ومنها نوعين، نوع على مدار السنه ونوع موسمى:
    - العطس
    - احساس بالحكه فى الأنف والعين
    - رشح من الأنف او الزكام
    - احمرار فى العين

  • حساسية الأكل:
    - تنميل للفم
    - انتفاخ او تورم فى الشفتين، الوجه واللسان
    - اسهال
    - حكه او طفح جلدى

  • لدغةالحشرات:
    - تورم فى منطقه كبيره حول مكان اللدغة أو قرصة الحشرة
    - حكه او طفح جلدى
    - كحه او صعوبة فى التنفس

  • حساسية الأدويه:
    - حكه جلديه
    - طفح جلدى
    - ورم فى الوجه
    - تفاعل تحسسى

  • حساسية الجلدأو الأكزيما:
    - احمرار
    - حكه
    - تقشير فى الجلد

  • حساسية العين:
    - احمرار
    - دموع
    - احساس بالحرقان
    - زغلله فى الرؤيه
    - التهابات
    - رشح للأنف
    - انتفاخ للجفون

  • حساسية القطط:
    على غير المتوقع أن الحساسيه مابتكونش فى الغالب من فرو أو شعر القطط، لكن بتكون من اللعاب، البول أو أى سوائل من جسمها واللى بتكون ناشفه على الشعر أو الفرو.
    وممكن ماتكونش حساس من القطط لكن ممكن تعطس فى بعض الأحيان لو قربت منهم لأن القطط اللى بتخرج كتير بره البيت أو القطط ف الشارع فروها بيحتوى على مختلف المواد أو الحشرات وغيره اللى ممكن تعملك حساسيه.
    - الكحه أو تزييق فى الصدر
    - طفح جلدى
    - احمرار واحساس بالحكه فى العين
    - العطس
    - احمرار لجلد فى مكان القطه خربشتك فيه مثلاً

  • حساسية الربيع:
    تعتبر جزء من حساسية الأنف — النوع الموسمى.

  • حساسية الصيف:
    ممكن تكون الأسباب هنا العشب، الحشائش أو الدخان وملوثات الهواء واللى بتزيد فى فصل الصيف.

  • حساسية الخريف:
    الأسباب من ميكروبات الجو فى فصل الخريف مع أن بعض الناس الحساسه لأنواع معينه من الحشائش ممكن تكون حساسه كمان لبعض الخضراوات أو الفاكهه زى الموز والشمام وغيره.

  • حساسية الشتاء:
    بيكون سببها الميكروبات المتواجده فى الجو فى فترة الشتاء.

عشان تفرق هو دور برد ولا حساسية الشتاء هتلاقى الفرق فى الغالب هيكون فى المدة، لأنغالباً دور البرد مش هيستمر معاك أكتر من 10 أيام لكن الحساسيه بتاخد فصل الشتاء كله .. كمان فيه أعراض أخرى بتكون مصاحبه للبرد زى تكسير فى الجسم أو حمى ممكن تميز بيها دور البرد أو الأنفلونزا.

الأعراض لحساسيات الفصول متماثله:
- الكحه
- الهالات السوداء تحت العين
- حكه فى العين والأنف
- العطس
- دموع كتيرة

التفاعل التحسسى:
فيه بعض الحالات بتوصل المشكله الى تهديد لحياة الشخص ومن ضمن أعراضها:
- فقدان الوعى
- هبوط فى ضغط الدم
- ضيق فى التنفس
- طفح جلدى
- غثيان وقئ
- نبض ضعيف وبطئ
لو حصل النوع ده لازم تتصل بالطوارئ فوراً او تنقل الشخص على المستشفى فى الحال.

المضاعفات:
- التفاعل التحسسى: ذكرناه سابقاً
- وفيه بعض الأمراض بتزيد نسبة حدوثها مع الحساسيه مثلاً زى الربو الشعبى، التهاب الجيوب الأنفيه وبعض العدوى الفطريه للجيوب الأنفيه أو حتى الجهاز التنفسى.

التشخيص:
الطبيب بياخد من الشخص تفاصيل عن الأعراض وبيكشف عليه وبيسأله عن المواد اللى اتعرضلها.

ولو كانت حساسية أكل هيبقى التدقيق أكتر عن منتجات الألبان وهيطلب منك انك تمنعها فى أكلك ويتابع اذا كان حصل حساسيه او لا للتأكد أنها كانت السبب.

لكن عموماً فيه بعض التحاليل اللى بنعملها زى:

- اختبار حساسية الجلد:
الطبيب أو الممرضه هيحقنوا الجلد بكميه قليله من الماده المشكوك انها مسببه الحساسيه ولو كنت حساس منها بالفعل هتكون النتيجه احمرار وظهور تورم فى منطقة الحقن.

- تحليل الدم:
وده بيعتمد على فكرة ان الجسم بينتج زى ماذكرنا سابقاً أجسام مضاده ضد الماده الحساس منها.
التحليل ده بيدور على الأجسام المضاده دى ويحدد نسبتها فى الدم وبالطبع زيادتها بيعنى وجود الحساسيه.

نيجى للخطوة المهمه،أيه العلاج:

- تجنب الماده الحساس منها:
بعد تحديد الماده الحساس منها هيبقى أكيد أهم علاج هو أنك ماتتعرضش أو تتجنب الماده دى.

- الأدوية:
الطبيب ممكن يوصف بعض الأدويه اللى بتقلل رد فعل الجهاز المناعى وممكن فقط يوصف الأدويه المتداولة المضاده للحساسيه من أقراص، بخاخات أو قطرات.

- العلاج المناعى:
العلاج ده فكرته أنه يعرض جسمك للماده الحساس منها بكميات قليله جداً ويبدأ يعلى تدريجياً فى الكميه على مدار فترة طويله ممكن تصل لسنين. وتقدر تقول أنها محاوله أنجسمك يألف الماده دى أو يتعود على وجودها فبعد كده مايعتبرهاش جسم غريب أو خطر ومايديش ضدها رد فعل عنيف أو يكون أجسام مضاده.
العلاج ده بنلجأله لما بيفشل التعامل مع الماده الحساسه بأى طريقه تانيه للعلاج.

- الأدرينالين:
بيتم استخدام حقنه منه وبيعتبر أنه بينقذ حياة الأنسان فى الحاله الحرجه والخطيرة دى لأنه بيعاكس عمل الهيستامين وهى الماده اللى بتنتج فى الحساسيه بكميات كبيرة وبتسبب الأعراض، فبيرفع الضغط للطبيعى وبيوسع الممرات الهوائيه.

لو طفلك بيعانى من أى نوع من أنواع الحساسيه تعملى أيه عشان تطمنى أنه آمن فى المدرسه:
  1. قابلى فريق عمل المدرسه وعرفيهم على مشكلته مع الحساسيه.
  2. خلى معاه بطاقه مكتوب عليها الماده المتحسس منها والأعراض والأدويه.
  3. اطلبى من المدرسين أنهم يلاحظوا اى تغير او سوء فى الأعراض زى أنه مابيقدرش يركز، احمرار زايد فى العين أوغيره وده لأن طبعاً الطفل فى الدراسه بيقعد فى المدرسه فترات طويله أكتر من البيت.
  4. اشركى طفلك: أكيد الطفل بيتعرض لمختلف المواد فى المدرسه فأسأليه لو فيه أى حاجه سببتله رشح للأنف، عطس أو غيره.
  5. ممكن يكون عنده حساسية من الطباشير مثلاً يبقى لازم ياخد باله مايتعاملش معاه.
Image Ads

التعليقات

fff