اتصل بنا

الإيدز ما بين الاشاعات والحقائق

heart
مرض الأيدز فى نظر معظم الناس هو نهاية حياة الانسان صحياً واجتماعياً!

ويمكن مرض الأيدز الناس بتعتبره منطقة محرمة فى الكلام عنه لأن من ضمن أسباب انتقاله هو العلاقات الجنسية المتعددة.

ده بيكسب مرض الأيدز غموض وعدم معرفةبيه وأصبح أى انسان اُصيب به محل سخط من المجتمع

تعالوا هنفهم أكتر عن مرض الأيدز وهنعرف أن أحياناً مريض الأيدز ضحية مش متهم "لأن فيه أسباب أخرى للانتقال"

الأسباب:
- هى عدوى فيروسية بتنتقل عن طريق:
- العلاقات الجنسية
- من الأم لجنينها أو لرضيعها
- نقل دم ملوث
- تبادل سرنجات بين الشخص المُصاب وأشخاص أخرين

الفيروس ده بيضرب كرات الدم البيضاء "نوع مخصوص منهاCD4 " وطبعاً معروف أن كرات الدم البيضاء هى خط دفاع الجسم ضد أى عدوى "وده بيفسر ليه مع وجود عدوى فى جسمك وعملت تحليل دم هتجد أن عدد كرات الدم البيضاء أعلى من الطبيعى لأن الجسم بيزود إنتاجها عشان تقدر تحارب العدوى

ومع تطور العدوى وطول الفترة الفيروس بيستمرفىتدمير الجهاز المناعى أكتر وأكتر وبتبدأ الأعراض تظهر على المُصاب

الأعراض:

المرحلة الأولى:
معظم الناس اللى بتُصاب بالفيروس بتحس بأعراض تشبه نزلات البرد وبيعتقدوا ساعتها أنه دور برد عادى وده بيجعل المرض متخفى عن فكر المُصاب والأعراض دى ممكن تستمر لعدة أسابيع زى:
- الحمى
- الصداع
- آلام العضلات والعظام
- ألم الحلق
- طفح جلدى
- تورم فى العقد الليمفاوية فى الرقبة
بالرغم أن الأعراض بتكون خفيفة جداً لدرجة أن المريض ممكن ميلاحظهاش،إلا أن كمية الفيروس بتكون أعلى مايمكن فى الدم فى الفترة دى وده بيجعل العدوى تنتشر أكتر فى المرحلة دى عن المرحلة التانية.

المرحلة الخفية "المزمنة":
طول المرحلة دى الأعراض بتكون مش واضحة"نسبة قليلة ممكن يكون تورم العقد الليمفاوية لسه متواجد"
الفترة دى ممكن تستمر لـ 10 سنين لو المُصاب مابيتعالجش بأدوية مضادة للفيروس
أما لو المُصاب اكتشف العدوى وقدر أنه يتعالج فالمرحلة دى ممكن تستمر لعقود وده شئ كويس لأنها أفضل مرحلة فى المرض "لأن زى ماقولنا مفيش علاج الى الآن للمرض يبقى أحسن طريقة أننانعطل تطور المرض"

مرحلة الأعراض المبكرة:
ولأن الفيروس مستمر فى التكاثر وتدمير جهاز المناعة المريض بيبقى عُرضة لمختلف أنواع العدوى الخفيفة الى حد ما فى المرحلة دى، والأعراض بتتمثل فى:
- الحمى
- الاجهاد
- تضخم العقد الليمفاوية
- الإسهال
- نقص الوزن

مرحلة مرض الأيدز "نقص المناعة المكتسبة":
هنا خلاص العدوى اتحولت لمرض بالفعل!
وهنا جهاز المناعة بتاع المريض تقريباً اتدمر بشكل شبه كامل لدرجة أن الجسم أصبح عُرضةأن بعض البكتريا الضعيفة "اللى ماعندهاش القدرة على إحداث عدوى أو مرض للجسم السليم" وبقت قادرة أنها تأذى جسم المريض بشكل كبير.
من بعض أعراض العدوى:
- التعرق الشديد بالليل
- الحمى المتكررة
- الإسهال المزمن
- نقاط بيضاء على اللسان
- نقص المناعة
- الطفح الجلدى
- الأرهاق المزمن الغير مفسر

مضاعفات المرض:
ولأن جهاز المناعة متدمر عند المريض ده بيجعله يتعرض لمختلف أنواع العدوى والسرطانات.
أشهر أنواع العدوى:
- الدرن: من أكتر العدوى اللى ممكن يُصاب بيها المريض
- الفيروس المضخم للخلايا Cytomegalovirus: ده نوع من أنواع الهربس واللى بيدخل الجسم ويفضل فى مرحلة خاملة لو جهاز المناعة سليم لكن لو زى فى حالة مريض الأيدز هتظهر أعراض للعدوى
- داء المبيضات Candidiasis: وده نوع من الفطريات ضعيف كمان مايقدرش يسبب مشكلة مع الجسم السليم لكن مع المناعة الضعيفة هيكون أقوى وبيسبب طبقه بيضاء مميزة سميكة فى الفم، على اللسان، على الحلق، أو فى المهبل
- التهاب الأغشية السحائيةcryptococcal meningitis: التهاب لأغشية المخ

أشهر أنواع السرطانات:
- Kaposi's sarcoma: نوع نادر من السرطانات فى الناس العادية لكن مشهور جداً مع مرضى الأيدز
هو سرطان بيصيب جدار الأوعية الدموية واللى بتظهر على الجلد فى هيئة نقط حمراء أو وردية وللناس اللى بشرتها أغمق ممكن تظهر بقع أو نقط بنية. كمان ممكن يصيب الجهاز الهضمى والرئة.
- الورم الليفى lymphoma: نوع من السرطان بيصيب كرات الدم البيضاء وبيظهر على هيئة تضخم فى العقد الليمفاويةخصوصاً فى الرقبةوالإبط

مضاعفات أخرى:
- نقص الوزن والضعف الشديد: وفيه بيحدث نقص 10% من وزن الجسم معالإسهال المزمن والضعف العام.
- المضاعفات العصبية: بالرغم أن الفيروس مابيصيبش الأعصاب إلا أنه بيسبب مضاعفات للأعصاب زى الأكتئاب، الضيق الشديد، النسيان وغيره
- أمراض الكلى: التهاب بيصيب الكلى

التشخيص:
بيتم تشخيص العدوى بفحص الدم أو اللعاب وكشف الأجسام المضادة ضد الفيروس "مع العدوى جهاز المناعة فى محاولة منه لمحاربة الفيروس بيكون ضده أجسام مضادة ودى هى اللى بندور عليها فى سوائل الجسم عشان نشخص العدوى".
لكن المشكلة عشان الجسم يكون كون عدد كاف من الأجسام المضادة وتظهر فى الدم ده ممكن يكون بعد فترة أكتر من 12 أسبوع.
ده جعل الباحثين يفكروا أنهم يدوروا على الفيروس نفسه بحيث لو أى شخص شك أن أنتقل له المرض يقدر يكتشف فى مرحلة مبكرة جداً عشان يقدر يمنع تطور المرض.
كمان التشخيص المبكر هيجعل المُصاب حذر فى التعامل مع الأخرين وهيمنع العدوى لأشخاص أخرين.

العلاج:
زى ما اتفقنا مفيش علاج نهائى يقضى على المرض لكن كل اللى نقدر نعمله أن المريض بيمشى على خطة علاج من أكتر من دواء من مضاد الفيروسات عشان نقلل عدد الفيروس ونبطء عملية تدمير جهاز المناعة.
أى شخص مُصاب بالفيروس لازم يبدأ العلاج بغض النظر عن عدد CD4 وضرر كرات الدم البيضاء.
يمكن فيه صعوبات للعلاج لأنه بياخد أكتر من دواء فى أوقات محددة فى اليوم يومياً، ولهم بعض الأثار الجانبية زى: الغثيان، أمراض القلب، ضعف العظام وغيرهم.
نتمنى فى نهاية المقال أننا نكون قدمنالكم صورة أوضح للمرض وقدمنا المعلومات اللازمة.
Image Ads

التعليقات

fff